Վեդիի Խ. Սողոմոնյանի անվ. հ.2 հիմնական դպրոց

 Արդեն չորրորդ տարին է, որ բոլորիս հուզող այն խնդրին, թե ինչ ճակատագրի են արժանանում Եղեռնի զոհերի հիշատակի օրվան նվիրված ծաղիկները, արդեն ստացել է իր լուծումը: Ծաղիկներն անմար կրակի մոտից տեղափոխվում է հուշահամալիրի այլ, ավելի ազատ տարածք, տեսակավորվում է: Ծաղկաթերթերն զգուշորեն առանձնացվում են ցողուններից և տերևներից: Ծաղկաթերթերը վերամշակվում են հատուկ եղանակով, որից հետո ստացվում է թուղթ, հետագայում օգտագործվում է բացիկներ, ծրարներ պատրաստելու նպատակով, իսկ ցողունները և տերևները դառնում են բնական պարարտխառնուրդ և օգտագործվում են հենց Ծիծեռնակաբերդի ծառուղիների, ինչպես նաև այլ այգիների մշակման համար:

 Բացառություն չէր նաև այս տարվա ապրիլի 26-ին Ծիծեռնակաբերդի հուշահամալիրում ծաղկահավաքի հերթական ակցիան: Անզեն աչքով էլ երևում էր, որ այս տարի ծաղիկներն ավելի շատ էին քան նախորդ տարիներինը, ուստի մասնակիցների շրջանակն էլ ավելի մեծ էր:

 Վայրի բնության և մշակութային արժեքների պահպանման հիմնադրամի, ՎիվաՍել-ՄՏՍ ընկերության և Հայոց ցեղասպանության թանգարան-ինստիտուտի նախաձեռնությանը մասնակցեցին Հայաստանում ԱՄՆ դեսպան Ջոն Հեֆֆերնն իր տիկնոջ հետ, Արևորդիները, «Կանաչ դպրոց» նախագծի աշակերտները Հայաստանի տարբեր մարզերից, ‹‹Դեպի Հայք›› հիմնադրամի կամավորները, Հայաստանի ազգային Սկաուտական շարժում ՀԿ-ի անդամ ները, «Փոքր Մհեր» ռազմական կրթահամալիրի սաները, ինչպես նաև ՀՀԿ երիտասարդական կազմակերպության անդամները: 

 2012 թվականից ք. Վեդիի Խ. Սողոմոնյանի անվ. հ.2 հիմնական դպրոցը համագործակցում է «Կանաչ դպրոց» նախագծի հետ և իր մասնակցությունն ունեցավ Մեծ Եղեռնի զոհերի Հուշահամալիրում կազմակերպված ավանդական ծաղկահավաքին: Աշակերտները և ուսուցիչները միահամուռ ջանքերով իրականացնում էին նախատեսված աշխատանքները, որոնք ուղղված էին ծաղիկների մշակմանը: